لقاء مع الصديق ( جولان )

الســــلام عليكم ورحمه الله وبركاته
تحية معطرة بالياســمين الدمشــقي وأروع باقات زهور المحبة
كمان نعلم جميعاً كان اللقاء الأول من مجموعة ( لقائات مباشــرة ) مع الأخت الغالية ( ألين ) وقد تعرفنا على حياتها وأفكارها ومشــاعرها والكثير مما هو غامض بالنســبة لنا .
والأن ســأقدم لكم أحد أروع الأشــخاص في المنتدى وأحد أعز أصدقائي
الصديق الغالي والأخ العزيز ( جولان )
وقد قمت بطرح بعض الأســئلة منها الشـخصية ومنها العامية
لن أطيل عليكم .... أترككم مع اللقاء

بشار : عرف عن نفســك : الأسـم ، الأقامة ، العمر ، الدراسة أو العمل ، الهواية
جولان : الأســم محمد خير ، العمر 24 سنة ، الأقامة الرياض من مواليد دمشق ، العمل في مجال الشــبكات والأنترنت ، الهواية السـفر
بشار : انت مغترب .... حدثنا عن الغربة وشو رأيك فيها ؟
جولان : بتعللمك كتير شغلات أهم شغلة بتحسك بأمك أديش بتتعذب لما تطبخ وتكوي وتغسل وتنضف بتحس بقيمة الوالدة وبتقول بس أرجع رح أعرف أدديش أمي عم تتعب
بتعلمك تعتمد على نفسك وتحل مشاكلك بحالك مافي حدا يساعدك أو يسأل عنك
بتمر بأي ظرف لحالك ماحد جنبك بتتعلم كتير شغلات مع ناس جداد عادات جديدة
بدك تتأقلم معاها وبين هاللحظات الحلوة بالغربة وأنت مبسوط بتجييك لحظة حنين وشوق لأهلك وصحابك
بتسب الغربة ويلي فيا وبتعرف أنو ساعة ببلدك أحسن من الغربة كلها بس ما جبرنا على المرر الا الأمرر
بشار : هل تنصح الشباب بالغربة ؟
جولان : والله بنصح اذا الشب طالع كرمال يشتغل ويأمن ويحسن مستقبلو وبنصح الشباب بالغربة لمكان يكون فيه حدا بيعررفو
ومايصدقوا كل شي بينقال بالنسبة للمادة
بشار : أنت تدخل الشات ( الرومات ) شو رأيك فيهم ؟
جولان : كنت أدخل مشان بنات وهيك قصص من سنتين بس بعدين لا مشان شوف ناس جداد كون علاقات
حلوة اذا عرفنا نستخدما ونستغل أنو الشات مشان التواصل مو بس مشان الشب يتعرف على بنت أو العكس
ممكن يتناقش في وتنحل فيي مشاكل ممكن نستفيد منو أكتر من هييك
بشار : شو هي أمنياتك بهالحياة ؟
جولان : أمنيتي ارجع لبلدي عيش مواطن وأمن مستقبل وأخد البنت ييلي ببالي
بشار : ما هي مواصفات فتاة أحلامك ؟
جولان : بحب بالبنت أول شي أخلاقا ودينا الشي التاني تكون حلوة التالتة محافظة على أنوثتا
بشار : رتب هذه الكلمات بدأ بالأفضل لك: المال ، السعادة ، الأهل ، الزواج
جولان : الأهل المال الزواج السعادة
بشار : انا بعرف انك بتحكي كتير بالسياسة ...... احكيلنا عن رأيك بكلشي عم يصير هلأ بفلسطين والعراق وبكامل الحرية
جولان : لا يبدل الله ما بقوم حتى يبدلو مافي أنفسهم
خيانة والحق أولا وأخير ا على الأمة العربية اللي تعدادها 400 مليون أو أكتر مو قادرة تساوي
شي ان كان بالصعيد العلمي ولا الاقتصادي ولا السياسي ولا أي شي
تميزنا بالتخلف
بتمنى اسمع يوم أنو العرب مصيطريين على مجال من مجالات العلم وعم تصيير عنا اختراعات وبتمنى يوم جاهد واكسب فرصة الجهاد في سبيل الله متل كل شب عربي
بشار : أنت اكيد سمعت بالرسومات المســيئة لشخص الرسول عليه الصلاة والسلام وكانت الحجة هي ( حرية الرأي ) انت شو رايك بالشي يلي صار وشو رايك برد المسلمين والعرب بشكل خاص
جولان : ممممممم هي الرسسومات ما مسست ولا رح تمسس رسول الله
النبي صلى الله عليه وسلم توفى من زمان وحملنا أمانة الاسسلام
الاهانة للأمة الاسلامية ككل
لكل شخص بيحب سيدنا محمد بس والرد بهاد الشي لازم يكون بالمقاطعة الدول الأوربية وامريكا
هدفها بالوطن العربي اقتصادي هالمنتجات تبعون بدها أسواق كبيرة بسبب الانتاج والتطور الكبير
وهي القشة يلي بتقسسم ظهر البعير
مافي أمل للشعوب غير تقاطع وأكيد المقاطعة الها نتيجة وبوقت قصير
رد المسلمين مافي ررد للأسف ماحدا رد ما حدا منع بضايع أمريكية ولا دنماركية ولا هولندية وللاسف قريبا فلم جديد عن الاسلام وبينتقد الاسلام
بشار : عرف لنا هذه الكلمات : الغربة ، الحب ، الخيانة ، الصداقة ،
جولان : الغربة بتعرف فيا الحلو والمر بوقت واحد والشوق وبتعرف شو يعني وطن وبلد
الحب شي عظيم كتير ومشاعر سامية كتير مو أي انسان بيقدر يمتلكا أو يحافظ عليها
الخيانة أبشع شي ويلي بيخونيي بحقد علييه وما بقدر سامحو
الصداقة أحلى الششششششششي بالدنيا ذكرياتها كتير حلوة بتضل طول العمر تحكي فيها وما تمل من أنك تتذكرها ورب أخ لك لم تلده أمك
بشار : ما هو برجك وهل تؤمن بالأبراج ؟
جولان : برج الدلو ما بأمن فيا بأمن بالقضاء والقد ر بس بحب اقرا ها كنوع من التفائل بس ماباخد فيا
بشار : بما انك مغترب حدثنا عم حنينك لبلدك ؟
جولان : بحن لريحة الياسمين يلي بشما بالبلد بهالوقت
بحن لكاسة الشاي بجو الشام الصيفي
للناس لكل مكان رحت عليه بحن لاسمع الادان من الجامع الأموي
لأمشي بالحارات القديمة
بشار : من يوجد داخل قلب جولان ؟
جولان : حبيبتي يلي مستحيل أنسا ها وأهلي وأصدقائي

بشار : هل فقدت انسان عزيز عليك ؟ ومن هو

جولان : فقدت انسانين بعتبرون من أهلي جدي وستي الله يرحمون

بشار : ما هي أسوء لحظة مررت بها

جولان : أسوء لحظة لما ودعت أهلي وصحابي وبدي سافر بس كانت مع فرحة بالسفر

دموع وفرح من جووى بس اسوأ شي ما عندي الحمد لله أنا من النوع بنسى الشغلات يلي مو حلوة بسرعة مابحب اتذكرها

بشار : لديك 30 ثانية لتذكر لنا اسماء اشخاص تحبهم

جولان : ضحى محمد طيب رضوان

وحضرتك

بشار : حدثنا عن موقف محرج حصل معك

جولان : ايه لما كنت عامل مشكلة وعرف مدير المدرسة أنو أمي مدرسة بنفس المدرسة

بشار : وجه بعض الكلمات لــ : اسرائيل ، سوريا ، ايران

جولان : اسرائيل الها يوم أكيد وبني اسرائيل بيعلو بالدنيا مرتين أول مرة بزمن سيدنا موسى وهي هلئ ردو صارو الأعلون باذن الله أخر مرة متل ما نزل بسورة الاسسراء

سورريا أحلى بلد ومافي متلى بالنسسبة لتعايش الأديان والشعب بيكفي أنو الشام اسمها ارض الجهاد والنبي بارك فيها

بارك الله في يماننا وشامنا

ايران دولة حلوة وأهدافها حلوة اذا كانت بعيدة عن الدين

لأنو الها وضع خاص ايران

القصد أنو تكون باسم الاسلام مو بس باسم طائفة وحدة

مواقفها حلوة

بشار : اختر بلد عربي وبلد اجنبي تتمنى زيارته

جولان : ايطاليا والأمارات

بشار : كم ساعة تدخل الانترنت يومياً ؟ وماذا تفعل

جولان : تقريبا 13 ساعة شغلي فيه وكنت قبل ادخل 14 الى 16 ساعة

بشار : ما هو أكثر شيئ تفكر فيه ؟

جولان : المستقبل

بشار : هل تتمنى أن تكون موظف حكومي أم عامل حر ؟ ولماذا

جولان : لا عامل حرر أكيد الوظيفة ممكن يكون أحيانا فيها شي من الحرام

الحر أحسن

وبالتطور أفضل

بشار : ما هو شعارك في الحياة

جولان : شعاري أني عيش يومي ولحظتي وانسى الماضي وطلع لبكرة

بشار : تملك باقة من الورود لمن تعطيها ؟

جولان : لحبيبتي وبقلها معافاية

بشار : ما رأيك بالمنتدى ؟

جولان : حلو كتير وباذن الله الو مستقبل

بشار : وجه بعض الكلمات لأعضاء المنتدى

جولان : ممممممم عسا نقدم شي ينكتبلنا فيه ثواب وأجر والله يعطيكون العافية يارب

صديقي جولان بتحب تضيف شي ؟

جولان : ادعولي أنو أخطب وأتزوج بأسرع وقت البنت يلي ببالي

ان شاء الله البنت يلي ببالك ما بتكون الا الك وبازن الله رح نفرح فيك باقرب وقت

انتهى اللقاء وان شاء الله تكونو انبسطوا معنا اليوم واتعرفتو على جولان يلي رح يكون من أعز الأصدقاء بالمنتدى بأزن الله

ويلي عندو أســئلة تانية بيقدر يكتبها وجولان بيجاوب عليها بأقرب فرصة

مشــكور أحلى جولانو على الوقت يلي عطيتني ياه والله يعطيك الف عافية يا رب

وان شاء الله رح يكون في عضو او عضوة بالأسبوع القادم حتى نتعرف على بعضنا البعض أكثر وأكثررر أنتظروني الأسبوع الجاية مع عضو جديد وأســئلة جديدة ولقاء جديد

الغالي بشار اشتقنا لتواجدك ومواضعك
اول اشي بدي اشكرك ع مجهودك وبوجه تحية للاخ جولان لصراحتو
وتلقائيتو بالاجابة
حابة وجه للاخ كم سؤال ازا ماعندو مانع

قلم وورقة وخمس كلمات ماذا تكتب لمن تحب في لحظة فراق؟
جولان متى تشعر انك طفل ومتى تكون رجلا؟
جولان من انت ؟اقصد ان تعرف عن نفسك ب خمس كلمات او افعال
ماذا لو نظرت للمرأة ولم تعرف ملامحك؟

تحياتي وبتمنى انو القي اجابة
مشكورين

هلالالا بالغالي ألينو

مشــكورة على المرور والأهتمام

ونحنا بأنتظار جولان حتى يجاوب على الاســئلة

تحياتــــي الك يا غالية

السسسلام عليكم ورحمة الله وبركاته
شكرا كتير أخي بششاررفرحت كتير لاهتمامكك يسلمو ايديك بدنا نعمل مقابلة معك كمان ان شاء الله أخي بشار
بالنسسبة لأسسالة الأخت أليينو
أول سؤال بالنسبة للفراق أصعب شي بالحياة والأمل باللقاء دايما واذا ما كان بالدنيا بتأمل بالجنة يارب ومكان الأحبة بالقلب.

السؤال التاني جولان من الداخل طفل ما كببر للحين ومابدي اكبر رجل لما بيحتاج الموقف أني كون رجل .

السؤال التالت جولان: مزاجي , متفائل , حساس , فوضوي , بحب الحرية

لما اتطلع وما أعرف حالي بكون صحيان من النوم أكيد خخخخ.

[b]

السسلام عليــم
ممم
بصراحة اخي بشار مابعرف شو بدي احكي عنجد موضوع كتير حلو ومشاركة احلى

الله يعطيك العافية ويقويك يارب
وشكرأ

وعليكم الســلام

هلا أسير نورت المنتدى والموضوع

اهلا وسهلا فيك بين اخوانك واخوتك

ننتظر كل جديد ومفيد

وأتمنى لك الفائدة والمتعة برفقتنا

تحياتـــــــــــي لك

الله يعطيك الف عافية اخي بشار

موضوع كتير حلو

والأحلى اجاباتك اخي جولان

الله يقويك

لك مني ارق التحيات

دارك ماستر

مشكور اخي بشار على موضوعك الحلو
الله يحلي ايامك وايام الجميع
امتى دورك بقا؟

هلالا صديقي العزيز داركوو

مشــكور على المرور والله يعطيك الف عافية يا رب

تحياتــــــي لك

هلالا مرســـال المحبة

هلا فيكي اختي الغالية

الف شــكر الك على المرور والأهتمام

بالنسبة لدوري ان شاء الله على القريب بس انتو اتفقو مين بدو يعمل معي المقابلة وانا جاهز

تحياتـــــــي الك يا غالية

هلا فيك اكتر ياغالي
ان شاء الله عن قريب العاجل تجاوب على كل الاسئلة
وياريت انت الي تختار يكون احسن
مشكووور مرة ثانية

هلالالالا مرســـال

اووكي وانا جااهز بازن الله الاسبوع الجاية

بس مين رح يحط الأســئلة مو معقول انا كمان حط الأســئلة من عندي

مافي مشكلة انتو اختارو الشخص المناسب والاســئلة يلي بتحبوها

وانا بالانتظار

تحياتـــــــــي